Kurti-ministrit gjerman: Radoiçiq dhe grupi i tij vazhdojnë të paraqesin rrezik për sigurinë e Kosovës

Kryeministri në detyrë i Kosovës, Albin Kurti, ka pritur në takim ministrin e Jashtëm të Gjermanisë, Johann Wadephul.

Temë e diskutimit ka qenë raporti mes Kosovës dhe Serbisë, si dhe zbatimi i Marrëveshjes bazë të Brukselit dhe Aneksit të Ohrit.

Kurti ka theksuar se kanë kaluar më shumë se dy vjet nga sulmi terrorist në Banjskë, ku u vra rreshteri i Policisë së Kosovës, Afrim Bunjaku, dhe udhëheqësi i grupit terrorist, Milan Radoiçiq, ende nuk i është dorëzuar autoriteteve të Kosovës.

“Kryeministri nënvizoi faktin se edhe më shumë se dy vjet pas sulmit terrorist në Banjskë, ku mbeti i vrarë një rreshter i Policisë së Kosovës, udhëheqësi i këtij grupi terrorist dhe paramilitar, Millan Radoiçiq, vazhdon të endet i lirë në Serbi dhe Beogradi zyrtar refuzon t’ia dorëzojë atë dhe grupin e tij Republikës së Kosovës, përkundër fakteve për përfshirjen e tij në sulm dhe aktakuzës së prokurorisë së Kosovës ndaj tij, ndërkohë që ai dhe grupi i tij vazhdojnë të paraqesin rrezik për sigurinë e vendit”, është njoftuar nga Zyra e Kryeministrit.

Kurti ka theksuar gjithashtu se Kosova është e vendosur dhe e përkushtuar për të thelluar raportet bilaterale me Gjermaninë.

“Kryeministri u shpreh se Republika e Kosovës është e vendosur dhe e përkushtuar të punojë bashkë me Gjermaninë për të thelluar raportet bilaterale dhe për të avancuar në rrugën e saj drejt Bashkimit Evropian dhe NATO-s. Me këtë rast, ai theksoi se Republika e Kosovës meriton që të marrë statusin e vendit kandidat për anëtarësim në Bashkimin Evropian dhe që Komisioni Evropian duhet ta dorëzojë sa më parë pyetësorin për anëtarësim”, u tha nga Zyra e Kryeministrit.

Sinjali – aty ku e vërteta flet para lajmit!

/GazetaSinjali/

The post Kurti-ministrit gjerman: Radoiçiq dhe grupi i tij vazhdojnë të paraqesin rrezik për sigurinë e Kosovës appeared first on Sinjali.