Një vit nga sulmi në Ibër Lepenc, Kurti: Reagimi institucional ishte i menjëhershëm dhe kritik

Kryeministri në detyrë i vendit, Albin Kurti, ka kujtuar sot sulmin terrorist ndaj kanalit të Ibër Lepencit, një akt që, sipas tij, kishte për qëllim destabilizimin e Kosovës dhe shkatërrimin e infrastrukturës kritike.

Në një postim në rrjetet sociale, Kurti e cilësoi këtë sulm si një nga dy sulmet e rënda që janë realizuar ndaj Kosovës nga aktorë të jashtëm në dy vitet e fundit.

“Sot, një vit më parë, rreth orës 19:00, akuadukti i Ibër Lepencit në Varagë të Komunës së Zubin Potokut u bë cak i një sulmi terrorist. Ky ishte sulmi i dytë i rëndë ndaj Republikës sonë, pas atij në Banjskë të Zveçanit, dhe i pari ndaj infrastrukturës tonë kritike,” shkroi Kurti, duke theksuar pasojat e mundshme katastrofike të sulmit.

Ai sqaroi se shpërthimi ka dëmtuar rëndë akuaduktin, duke rrezikuar furnizimin me ujë për qytetet e Kosovës, përfshirë Prishtinën dhe komunat përreth, si dhe duke kërcënuar operimin e Termocentralit “Kosova B”. Sipas tij, kjo ka mundur të çojë në një ulje të 60% të kapaciteteve prodhuese të energjisë elektrike dhe ndërprerje të shërbimeve vitale në vend.

“Reagimi institucional ishte i menjëhershëm dhe kritik,” tha Kurti, duke vlerësuar veprimet e shpejta të institucioneve të Kosovës, të cilat, sipas tij, parandaluan katastrofën dhe siguruar furnizimin me ujë dhe energji për qytetarët.

Ai e quajti këtë një shembull të fuqishëm të gatishmërisë dhe aftësisë së shtetit për të përballuar kërcënimet terroriste.

Kurti theksoi gjithashtu se pas bastisjeve të zhvilluara në veri të Kosovës, ishin konfiskuar armë, uniforma dhe pajisje, ndër të cilat edhe emblema të strukturave ushtarake dhe të inteligjencës ruse dhe serbe.

Në fund, Kurti e përfundoi postimin duke nënvizuar se, përkundër kërcënimeve dhe sulmeve, shteti i Kosovës ka triumfuar dhe do të vazhdojë të mbrojë sigurinë dhe stabilitetin e vendit përballë këtyre grupeve të rrezikshme.

Sinjali – aty ku e vërteta flet para lajmit!

/GazetaSinjali/

The post Një vit nga sulmi në Ibër Lepenc, Kurti: Reagimi institucional ishte i menjëhershëm dhe kritik appeared first on Sinjali.