LDK akuzon VV-në për mashtrim politik – Thonë se e bllokoi procesin, tani pretendon merita

Ditën e sotme u votua bartja buxhetore nga viti paraprak për komunën e Prishtinës.

Reagime e kundër-reagime të shumta pati nga figurat e Lidhjes Demokratike të Kosovës dhe Lëvizjes Vetëvendosje.

Reagimi i fundit i LDK-së vjen për deklaratat VV-së duke e akuzuar këtë të fundit për një fushatë mashtruese dhe përpjekje për të marrë merita politike pas muajsh bllokadash të qëllimshme në Asamblenë e Kryeqytetit.

Në një komunikatë për media, LDK thotë se dokumentet zyrtare dëshmojnë se bartja e të hyrave vetanake ka dështuar tre herë radhazi për shkak të votës kundër të asamblistëve të VV-së. Sipas LDK-së, këto bllokada kanë paralizuar pagesat për shërbimet esenciale dhe kanë dëmtuar funksionimin e normal të qytetit të Prishtinës.

“Lidhja Demokratike e Kosovës denoncon prerazi fushatën e radhës së mashtrimit politik nga Lëvizja Vetëvendosje, e cila sot po përpiqet t’i shpëtojë përgjegjësisë duke trilluar merita për një proces që vetë e ka bllokuar tri herë radhazi”, thuhet në komunikatën e LDK-së.

Dokumentet e publikuara nga LDK tregojnë se bartja e të hyrave vetanake ka dështuar më 21 maj, 12 qershor dhe 27 qershor të vitit 2025, kur asambleistët e VV-së kanë votuar kundër. Ky veprim ka shkaktuar vonesa të rrezikshme dhe ka ndikuar drejtpërdrejt në ndalimin e pagesave për shërbimet e nevojshme për qytetarët.

“Tani, pas muajsh bllokadash të qëllimshme, Vetëvendosja del e pretendon se paska ‘zhbllokuar’ vetveten. Ky është modeli i tyre politik: krijo krizë, godit qytetin, pastaj dil në podium e shpall veten hero. Një paturpësi e pastër politike”, ka theksuar LDK.

Për më tepër, LDK ka theksuar se ajo ka mbrojtur gjithmonë stabilitetin financiar të Prishtinës, ndërsa VV ka punuar sistematikisht kundër interesave të qytetit për t’i shërbyer interesave të saj partiake. Sipas LDK-së, nuk ka asnjë fakt, votë apo procesverbal që mbështet narrativën e VV-së, përkundrazi, çdo dokument dëshmon bllokimin e hapur të VV-së në Asamblenë e Kryeqytetit.

“Qytetarët e Prishtinës duhet ta dinë: ata që sot po dalin me fjalë të mëdha kanë qenë pengmarrësit e kryeqytetit. Ata që shkaktuan vonesa e rreziqe financiare tani mundohen të fshihen pas pështjellimit propagandistik”, është shprehur LDK.

Në fund, LDK ka konfirmuar se do të vazhdojë të mbrojë interesin e qytetit me vendosmëri dhe integritet, duke e kundërshtuar çdo përpjekje të Lëvizjes Vetëvendosje për të minuar funksionimin e institucioneve të Prishtinës.

Sinjali – aty ku e vërteta flet para lajmit!

/GazetaSinjali/

The post LDK akuzon VV-në për mashtrim politik – Thonë se e bllokoi procesin, tani pretendon merita appeared first on Sinjali.