Musliu e ashpër ndaj VV-së: Zhylla e shkatërrues – Shkojnë me festu pavarsinë, përfundojnë duke iu përgjëruar mërgatës

Ganimete Musliu, deputete e Partisë Demokratike të Kosovës (PDK), ka reaguar ashpër ndaj veprimeve të Qeverisë në detyrë, duke e quajtur atë “vrasës të shpresës dhe të ardhmes së këtij vendi”. Ky reagim ka ardhur pas deklaratave të përfaqësuesve të Lëvizjes Vetëvendosje (VV), të cilët, nga Shqipëria, gjatë festimeve të 28 dhe 29 nëntorit, përdorën momentin për të uruar shqiptarët dhe për t’i bërë thirrje mërgimtarëve të marrin pjesë në zgjedhjet e 28 dhjetorit.

Musliu ka akuzuar Ministrin e Punëve të Brendshme, Xhelal Sveçla, Ministren e Punëve të Jashtme, Donika Gërvalla, dhe ish-nënkryetaren e Kuvendit, Albulena Haxhiu, se po përpiqen të shfrytëzojnë momentet festive për fushatë zgjedhore, duke iu drejtuar mërgatës për mbështetje.

Ajo ka theksuar se VV-ja po i “përgjërohet” mërgatës për shpëtim, duke e cilësuar këtë si një veprim të dëshpëruar.

“E ka kapur paniku këtë farë të fëlliqur. Shkojnë për të festuar festën kombëtare, e përfundojnë duke u përgjëruar mërgimtarëve për shpëtim”, ka shkruar Musliu, duke e cilësuar këtë veprim si një tregues të paaftësisë së Qeverisë për të ofruar një vizion të qartë dhe të besueshëm për të ardhmen e vendit.

Musliu nuk ka kursyer akuza të tjera, duke e akuzuar Qeverinë e udhëhequr nga VV-në për mosrespektimin e festave kombëtare dhe të traditave, si dhe për manipulatorët që janë të interesuar vetëm për përfitime politike. “Këta nuk respektojnë as festat kombëtare, as dasmat, as mortet, as mërgatën, as Kosovën, as Shqipërinë. Këta mashtrues e manipulues, këta zhylla e shkatërrues,” ka thënë ajo.

Në fund, Musliu ka theksuar se Qeveria aktuale është përgjegjëse për shkatërrimin e shpresës dhe mundësive për një të ardhme më të mirë për qytetarët e Kosovës.

“Këta janë vrasës të shpresës dhe të ardhmes së këtij vendi”, ka përfunduar ajo.

Sinjali – aty ku e vërteta flet para lajmit!

/GazetaSinjali/

The post Musliu e ashpër ndaj VV-së: Zhylla e shkatërrues – Shkojnë me festu pavarsinë, përfundojnë duke iu përgjëruar mërgatës appeared first on Sinjali.