Hoti: Qeveria Kurti e “korruptuar deri në fyt”

Ish-kryeministri dhe deputeti i Lidhjes Demokratike të Kosovës, Avdullah Hoti, ka akuzuar Qeverinë Kurti për nivel të lartë të korrupsionit.

Në një intervistë në emisionin “DPT te Fidani”, Hoti tha se ekzekutivi aktual është “korruptuar deri në fyt”, duke theksuar se disa nga aferat që janë ngritur në lidhje me këtë qeveri janë aktualisht në hetim nga organet e drejtësisë.

“Po them kushtimisht, kështu deri në fyt, domethënë aferat të cilat përfolen, disa prej të cilave janë në procedura të organeve të drejtësisë, nuk janë vetëm përfolje të mediave, të gazetarëve hulumtues, janë pjesë e organeve të drejtësisë duke u hetuar”, ka thënë Hoti.

Ai theksoi se situata aktuale është e pazakontë dhe nuk ka ndodhur kurrë më parë. Sipas tij, asnjëherë nuk ka pasur ministra që të ishin të ftuar në prokurori dhe të ishin ende në detyrë si ministra ose kryeshefa të ndërmarrjeve publike.

“Kurrë nuk ka ndodhur kështu. Kurrë nuk ka ndodhur me pasë ministra që shkojnë nëpër prokurori dhe të jenë në barrë ende si ministra ose kryeshefa të ndërmarrjeve publike që shkojnë nëpër prokurori si të akuzuar në procedura gjyqësore dhe ata ende mbahen në institucione”, tha ai.

Sinjali – aty ku e vërteta flet para lajmit!

/GazetaSinjali/

The post Hoti: Qeveria Kurti e “korruptuar deri në fyt” appeared first on Sinjali.