Ekskluzive | Grabitje në tentativë në Prishtinë, i dyshuari hyn me thikë në market dhe kërkon paratë

Marketet në vendin tonë jo rrallëherë janë cak i hajnave. Kjo dukuri po krijon pasiguri dhe frikë si për qytetarët, ashtu edhe për punëtorët që punojnë në këto biznese. Vjedhjet e grabitjet shpesh kryhen edhe nën kërcënimin e armëve të zjarrit ose mjeteve të tjera të rrezikshme.

Një ngjarje e rëndë ka ndodhur orëve të para të mëngjesit në kryeqytet, ku një person ka tentuar të kryejë grabitje nën kërcënimin e thikës në një market – mëson ekskluzivisht Gazeta Sinjali.

Incidenti ka ndodhur më 26.11.2025 rreth orës 01:30 në rrugën “Zagrebi” në Prishtinë, ku sipas deklarimit të ankueses M.S, derisa ishte duke punuar në marketin “FreeShop Sheholli”, i dyshuari Besart Metaj ka hyrë brenda në lokal me një thikë në dorë dhe i është drejtuar me fjalët: “Qiti krejt paret”.

Ankuesja ka refuzuar t’ia dorëzojë paratë, pas çka i dyshuari është larguar nga vendi i ngjarjes. Në market kishte kamera të sigurisë, të cilat pritet të shërbejnë si prova materiale për zbardhjen e plotë të rastit.

I dyshuari është ndaluar nga Policia e Kosovës dhe është intervistuar në prani të avokatit mbrojtës. Lidhur me rastin është njoftuar Prokurori kujdestar për Krime të Rënda, i cili ka urdhëruar inicimin e rastit për veprat penale “Grabitje në tentativë” dhe “Armëmbajtje pa leje”, ndërsa i dyshuari është dërguar në mbajtje për 48 orë.

Hetimet janë duke vazhduar, ndërsa burimet janë të besueshme, nga strukturat e afërta me hetimin.

Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.

Sinjali – aty ku e vërteta flet para lajmit!

/GazetaSinjali/

The post Ekskluzive | Grabitje në tentativë në Prishtinë, i dyshuari hyn me thikë në market dhe kërkon paratë appeared first on Sinjali.