Presidentja Osmani: Ky 28 Nëntor na dha krenari dhe forcë për të ecur përpara

Presidentja e Kosovës, Vjosa Osmani, e ka cilësuar udhëtimin e saj në Shqipëri si një “udhëtim zemre nëpër historinë e përbashkët”, duke marrë pjesë në ngjarjet shtetërore që shënuan 113-vjetorin e pavarësisë së Shqipërisë.

Osmani ka përshkruar mikpritjen në Shkodër si të jashtëzakonshme.

“Shkodra na hapi dyert si vetëm ajo di – me zemër plot, me rrugë që të flasin dhe me një dashuri që të kujton pse ky komb ka mbijetuar në çdo stuhi.”

Ajo ka vazhduar festën në Vlorë, qytetin ku, sipas saj, “flamuri nuk valëvitet thjesht nga era, por nga historia, nga gjaku, nga amaneti i lirisë.”

Osmani ka theksuar se në Vlorë, çdo 28 Nëntor merr kuptimin e tij të vërtetë.

“Krenarinë për atë që kemi qenë dhe forcën për të qenë më shumë.”, tha ajo.

Në mbrëmje, Osmani ishte e pranishme në Tiranë, në Pallatin e Brigadave, ku ceremonia e organizuar bashkoi dy shtetet shqiptare.

“Në atë hapësirë ku Shqipëria dhe Kosova nuk qëndrojnë si dy vende, por si një zemër e vetme që rreh përpara, me besim e me dinjitet”, ka thënë ajo.

Presidentja e Kosovës ka vlerësuar 28 Nëntorin si një moment reflektimi dhe shprese për të ardhmen.

“Ky 28 Nëntor ishte kujtesë dhe premtim njëkohësisht: se rruga jonë është e gjatë, por e jona; se historia nuk na ka lënë vetëm plagë, por edhe shumë arsye për të qenë krenarë”, ka shkruar Osmani.

Ajo ka përfunduar duke theksuar se shqiptarët, kudo që ndodhen, mbeten një komb që di të ngrihet, të festojë dhe të shikojë përpara me kokën lart.

The post Presidentja Osmani: Ky 28 Nëntor na dha krenari dhe forcë për të ecur përpara appeared first on Sinjali.