Ministri në detyrë Elbert Krasniqi dyshohet për kanosje, detaje nga Prokuroria në Pejë

Ministri në detyrë i Administrimit të Pushtetit Lokal, Elbert Krasniqi, është përfshirë në një incident të dyshuar për kanosje në Pejë më 23 nëntor, kur “Rruga e Re” ishte bllokuar nga një kolonë automjetesh.

Zëdhënësi i Prokurorisë Themelore në Pejë, Shkodran Nikçi, ka konfirmuar për Sinjalin se ndaj ministrit në detyrë është inicuar hetimi për veprën penale të “kanosjes”.

Nikçi ka theksuar se, sipas urdhrit të prokurorit, po merren të gjitha masat hetimore në bashkëpunim të plotë me Policinë e Kosovës.

“Me urdhër të prokurorit është iniciuar rast për kanosje. I dyshuari është një ministër në detyrë i Republikës së Kosovës. Po ndërmarrim të gjitha veprimet e nevojshme hetimore dhe jemi në koordinim të plotë me Policinë e Kosovës. Dyshohet se ngjarja ka ndodhur në një rrugë të bllokuar për shkak të trafikut, dhe i dyshuari ka dalë nga vetura dhe ka kanosur,” ka thënë ai.

Viktimat e incidentit kanë deklaruar se ministri Krasniqi, në momentet e tensionuara të trafikut, ka vendosur dorën mbi armën që mbante me vete, një veprim që ka ngjallur shqetësim te qytetarët.

Sinjali – aty ku e vërteta flet para lajmit!

/GazetaSinjali/

The post Ministri në detyrë Elbert Krasniqi dyshohet për kanosje, detaje nga Prokuroria në Pejë appeared first on Sinjali.