KQZ vendos sot për dizajnin dhe shtypjen e fletëvotimeve për zgjedhjet e 28 dhjetorit

Komisioni Qendror i Zgjedhjeve do të mbajë mbledhjen e radhës e cila do të udhëhiqet nga kryesuesi i Kreshnik Radoniqi.

Në këtë mbledhje do të shqyrtohen dhe diskutohen çështje kyçe që lidhen me përgatitjen e zgjedhjeve të jashtëzakonshme për Kuvendin e Republikës së Kosovës, që do të mbahen më 28 dhjetor 2025.

Sekretariati i KQZ-së do të paraqesë rekomandime për themelimin e një komisioni për shqyrtimin e kundërshtimeve administrative, si dhe për zhvillimin e procedurave emergjente të prokurimit që kanë të bëjnë me organizimin e procesit zgjedhor.

Po ashtu, Këshilli për Operacione Zgjedhore do të shqyrtojë dhe miratojë specifikimet teknike për shtypjen e fletëvotimeve, broshurave të kandidatëve dhe listave të votuesve.

Në rend dite është edhe miratimi i formularëve zyrtarë zgjedhorë si dhe përbërja e Komisioneve Komunale të Zgjedhjeve, të cilat do të kenë rol të rëndësishëm në mbarëvajtjen e procesit në nivel lokal.

Mbledhja pritet të përfundojë me diskutime rreth pikave të ndryshme të rendit të ditës, ndërsa KQZ synon të sigurojë që të gjitha përgatitjet të zhvillohen sipas afateve dhe standardeve të parashikuara për një proces zgjedhor transparent dhe efikas. 

Sinjali – aty ku e vërteta flet para lajmit!

/GazetaSinjali/

The post KQZ vendos sot për dizajnin dhe shtypjen e fletëvotimeve për zgjedhjet e 28 dhjetorit appeared first on Sinjali.