Kanosje dhe dhunë në familje në Pejë: 25-vjeçari dyshohet se kërcënoi ish-bashkëshorten “ta pres kryt me thikë”

Numri i rasteve të dhunës në familje në vendin tonë ka marrë përmasa shqetësuese. Çdo ditë raportohen ngjarje të tilla ku viktima zakonisht janë gratë dhe vajzat që përjetojnë dhunë psikike e fizike kryesisht nga bashkëshortët e tyre, raporton Gazeta Sinjali.

Një incident i tillë ka ndodhur dje pasdite në Pejë, ku një grua ka raportuar në Polici se është kanosur nga ish-bashkëshorti i saj, mëson ekskluzivisht Gazeta Sinjali.

Ngjarja ka ndodhur rreth orës 16:30, në rrugën “Bekim Berisha”.

Sipas të dhënave që disponon Sinjali, viktima V. N., rreth 21-vjeçare ka njoftuar Policinë se kishte probleme me ish-bashkëshortin e saj, të dyshuarin E. G., rreth 26-vjeçar. Patrulla ka shkuar menjëherë në lokacion, saktësisht në lokalin “Nana”, ku ka takuar viktimën dhe dëshmitaren R. N., rreth 20-vjeçare, të cilat janë shoqëruar në Stacionin Policor në Pejë.

Gjatë intervistimit, viktima ka deklaruar se i dyshuari ishte afruar tek tavolina ku ajo po rrinte me dëshmitaren dhe kishte nisur të bërtiste, duke kërkuar fillimisht që dëshmitarja të largohej.

Më pas, sipas saj, ai kishte filluar ta detyronte të shkonte me të dhe e kishte kërcënuar se do t’ia priste kokën me thikë, nëse nuk e ndiqte.

Dëshmitarja ka konfirmuar se i dyshuari ka folur me zë të lartë dhe e kishte paralajmëruar edhe atë, duke i thënë se “mund ta pësojë edhe ajo”, ndërsa kërkonte ta nxirrte viktimën jashtë.

Sipas deklarimit të viktimës, teksa ishte ngritur në këmbë, i kishte kërkuar dëshmitares të thërriste Policinë, ndërsa i dyshuari ishte larguar nga lokali.

Më vonë, i dyshuari është paraqitur vetë në polici për intervistim. Lidhur me rastin është njoftuar Prokurori kujdestar i Shtetit, i cili ka udhëzuar të iniciohet rasti “Dhunë në familje”.

Sinjali – aty ku e vërteta flet para lajmit!

/GazetaSinjali/

The post Kanosje dhe dhunë në familje në Pejë: 25-vjeçari dyshohet se kërcënoi ish-bashkëshorten “ta pres kryt me thikë” appeared first on Sinjali.