Ekskluzive | Vjedhje e rëndë si në filma në Fushë Kosovë – Persona të maskuar marrin kasafortën me mijëra euro nga “Rent-a-Car”

Një vjedhje e rëndë është regjistruar në orët e hershme të mëngjesit në rrugën e re të Aeroportit, në Sllatinë të Fushë Kosovës, ku është thyer me forcë një lokal “Rent-a-Car” dhe është vjedhur kasaforta me mijëra euro para të gatshme.

Ngjarja ka ndodhur më 23.11.2025, rreth orës 02:40, kur tre persona të maskuar, të pajisur me doreza dhe duke përdorur mjete të forta, kanë depërtuar me forcë në lokalin në pronësi të A. M.

Sipas incizimeve të kamerave të sigurisë, rreth orës 02:40 në afërsi të lokalit është parë një veturë e tipit Skoda, ngjyrë e zezë, me dy targa të ndryshme, e cila fillimisht ka qëndruar për disa minuta në vëzhgim.

Rreth orës 02:46 nga vetura kanë zbritur tre persona të maskuar, të cilët kanë thyer derën hyrëse dhe kanë marrë kasafortën, ku sipas pronarit ndodheshin rreth 4.000 deri 5.000 euro nga pazari i biznesit të qiramarrjes së veturave.

Në vendin e ngjarjes kanë dalë njësitet policore dhe hetuesit, të cilët kanë bërë këqyrjen e vendit dhe kanë sekuestruar pamjet e kamerave të sigurisë si prova materiale.

Lidhur me rastin është njoftuar Prokurori Kujdestar, i cili ka udhëzuar që të iniciohet rasti si “Vjedhje e rëndë”, ndërsa hetimet për identifikimin dhe arrestimin e të dyshuarve janë në vazhdim.

Sinjali – aty ku e vërteta flet para lajmit!

/GazetaSinjali/

The post Ekskluzive | Vjedhje e rëndë si në filma në Fushë Kosovë – Persona të maskuar marrin kasafortën me mijëra euro nga “Rent-a-Car” appeared first on Sinjali.