Ekskluzive | Ndalohet për 48 orë i dyshuari për tentim-vrasjen e të fejuarës në Fushë Kosovë

Burime të besueshme nga strukturat e afërta me hetimin konfirmojnë për Gazetën Sinjali se i dyshuari Edon Geci është dërguar në ndalim për 48 orë, pas ngjarjes së rëndë të ndodhur më 29 nëntor në rrugën Enver Maloku në Fushë Kosovë, ku e fejuara e tij D.T., rreth 23-vjeçare u dërgua me plagë të rëndë në QKUK dhe iu nënshtrua operacionit.

Sipas informatave, rreth orës 07:45 ishte kërkuar ambulancë në parkingun e banesave, ndërsa Policia së bashku me ekipin mjekësor kishin hyrë në banesë, ku ishte gjetur viktima me lëndim të rëndë. Fillimisht, të dy palët pretenduan se ngjarja kishte ndodhur aksidentalisht nga “prerja me gotë”.

Kur viktima u transferua në QKUK, rreth orës 11:40, mjeku kujdestar informoi Policinë se lëndimet nuk përputheshin me prerje nga gota, por me plagë të shkaktuar nga mjet i mprehtë, duke ngritur dyshime serioze për rrethanat reale.

Hetuesit dhe forenzika, të cilët kanë dalë në vendngjarje, gjetën dhe sekuestruan një thikë, e cila dyshohet të jetë përdorur në rast. I dyshuari më pas ka dhënë deklarim verbal se “viktima e ka lënduar veten”, por se ai nuk e kishte raportuar “që të mos e merrte vesh familja e saj”.

Rasti është marrë nga Hetimet Rajonale dhe është iniciuar si “Vrasje e rëndë në tentativë” me udhëzim të Prokurorit për Krime të Rënda.

Pas intervistimit në prezencë të avokatit mbrojtës, Prokurori kujdestar ka lëshuar aktvendim që i dyshuari të dërgohet në ndalim 48-orësh, derisa hetimet po vazhdojnë për zbardhjen e plotë të rastit.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.

Sinjali – aty ku e vërteta flet para lajmit!

/GazetaSinjali/

The post Ekskluzive | Ndalohet për 48 orë i dyshuari për tentim-vrasjen e të fejuarës në Fushë Kosovë appeared first on Sinjali.