Lista Serbe: Kryetarët e rinj në veri shkarkuan të gjithë drejtorët e emëruar politikisht

Kryetarët e sapo zgjedhur të katër komunave në veri të Kosovës, të cilët morën detyrën të premten, sot kanë shkarkuar të gjithë drejtorët e emëruar politikisht në degët komunale.

Kështu ka thënë Lista Serbe përmes një njoftimi, shkruan Kossev.

“Kryetarët e komunave Mitrovicë e Veriut, Milan Radojeviq, Zveçan, Dragisha Milovoq, Zubin Potok, Milosh Peroviq dhe Leposaviq Zoran Todiq kanë marrë detyrën në këto komuna dhe kanë marrë vendim për shkarkimin e të gjithë drejtorëve të emëruar politikisht në degët komunale”, thuhet në njoftim.

Ata shtuan se emërimi i drejtorëve të rinj të degëve komunale pritet në ditët në vijim.

Sot, kryetarët e rinj serbë në veri u vizituan nga shefi i Zyrës së Bashkimit Europian në Kosovë, Aivo Orav.

“Kryetarët kanë tërhequr vëmendjen mbi gjendjen jashtëzakonisht të keqe që kanë gjetur në administratat komunale – zyra të shkatërruara, mungesë totale e pajisjeve kompjuterike, dokumentacionit zyrtar dhe mobilieve bazë zyrtare, gjë që e vështirëson në masë të madhe funksionimin normal të administratës lokale dhe ofrimin e shërbimeve për qytetarët”, thuhet në njoftimin e Listës Serbe.

Sinjali – aty ku e vërteta flet para lajmit!

/GazetaSinjali/

The post Lista Serbe: Kryetarët e rinj në veri shkarkuan të gjithë drejtorët e emëruar politikisht appeared first on Sinjali.