Incident zjarri në Ferizaj, digjet mobileria “TEO” – dëmi arrin deri në 40 mijë euro

Një incident zjarri ka ndodhur mbrëmjen e së martës në fshatin Greme të Ferizajt, ku është përfshirë nga flakët një mobileri, duke shkaktuar dëme të konsiderueshme materiale.

Ngjarja ka ndodhur më 26.11.2025 rreth orës 21:30, pasi Policia është njoftuar për një zjarr në mobilerinë “TEO”. Njësitë patrulluese kanë dalë menjëherë në vendin e ngjarjes, duke bërë sigurimin e perimetrit dhe duke ndërmarrë veprimet e nevojshme hetimore.

Në vendngjarje janë angazhuar Hetimet e Stacionit Policor dhe forenzika, ku sipas të dhënave fillestare dyshohet se zjarri është shkaktuar si pasojë e luhatjes së tensionit të rrymës, që ka djegur orën elektrike dhe një pjesë të një makinerie pune. Sipas ankuesit, dëmi material sillet nga 30 mijë deri në 40 mijë euro.

Zjarrfikësit kanë intervenuar me kohë dhe kanë arritur ta lokalizojnë dhe shuajnë zjarrin, duke parandaluar përhapjen e tij në objektet përreth. Në vendngjarje ka dalë edhe njësia e KEDS-it për vlerësim teknik të instalimeve elektrike.

Hetimet do të vazhdojnë për të sqaruar plotësisht shkaqet dhe rrethanat e incidentit.

Rasti mbetet nën hetime.

Sinjali – aty ku e vërteta flet para lajmit!

/GazetaSinjali/

The post Incident zjarri në Ferizaj, digjet mobileria “TEO” – dëmi arrin deri në 40 mijë euro appeared first on Sinjali.