Haradinaj me thirrje para zgjedhjeve: Populli e ka kuptuar mashtrimin, bashkë e rikthejmë shpresën në vend

Kreu i AAK-së, Ramush Haradinaj, ka theksuar se tani është koha për vendime të mëdha dhe të guximshme për Kosovën.

Haradinaj ka shkruar se koha e fjalëve ka kaluar dhe Kosova nuk pret më.

“Të dashur qytetarë të Republikës së Kosovës, Kosova nuk pret më. Koha e fjalëve ka kaluar. Tani është koha e vendimeve të mëdha, dhe të guximshme. Sot, secili prej nesh e ka një detyrë. Ta mbrojmë të ardhmen e vendit tonë. Jo me fjalë të thata, por me votë të pastër, me qëndrim të fortë, dhe me dinjitet. Secili prej nesh do ta marrim përgjegjësinë që ta udhëheqim Kosovën drejt sigurisë, zhvillimit dhe drejtësisë”, ka shkruar ai në një postim në profilin e tij në “Facebook”,

Ai theksoi se 28 dhjetori është dita kur populli do të flasë, duke vënë në pah rolin e çdo shtrese të shoqërisë në këtë proces.

“Data është caktuar. Më 28 dhjetor, Kosova flet. Populli vendos. Kur voton ushtari, shtetit i kthehet nderi. Kur voton polici, familjet marrin siguri. Kur voton bujku, toka jonë merr frymë e ringjallet. Kur voton mjeku, shoqëria shërohet. Kur voton profesori, mësuesi, studenti, nxënësi, ndërtohet e ardhmja. Kur voton populli, fitojnë gjeneratat. Ne nuk jemi këtu as për frikësim, as për iluzione. Jemi këtu për ta kthyer besimin tek shteti. Për t’i dhënë Kosovës qeverisjen që punon, që s’dridhet, që nuk i shërben propagandës, por shtetit dhe qytetarëve, pa dallim. Dhe ditëve në vijim, do të jem me ju kudo”, ka shkruar ai.

Ai pati edhe një mesazh të posaçëm për mërgatën.

“Janë zemra e Kosovës në botë… Me votën e tyre, me votën tuaj, Kosovës i kthehet shpresa”.

Haradinaj ritheksoi rëndësinë e aleancave ndërkombëtare, duke theksuar se pa to “s’ka shtet të sigurt”.

Në fund, ai bëri thirrje për mobilizim të përgjithshëm më 28 dhjetor.

“Kosova mbrohet prej popullit. E populli më 28 dhjetor do të flasë fort. E do të flasë drejt”, ka shkruar Haradinaj.

Sinjali – aty ku e vërteta flet para lajmit!

/GazetaSinjali/

The post Haradinaj me thirrje para zgjedhjeve: Populli e ka kuptuar mashtrimin, bashkë e rikthejmë shpresën në vend appeared first on Sinjali.