Ekskluzive: Ky është punëtori i OSCE-së që u arrestua për ngacmim dhe dhunë psikike ndaj ish-gruas, iu gjet edhe kallashnikov me 16 fishekë

Gazeta Sinjali raportoi pak më parë për një rast serioz të dhunës psikike dhe ngacmimit në kuadër të marrëdhënieve familjare që është regjistruar në Prishtinë, ku një punëtor i OSCE-së është arrestuar pas denoncimit nga ish-bashkëshortja e tij.

Ngjarja ka ndodhur më 25.11.2025 rreth orës 09:30 në rrugën “Musa Tolaj”, ku ankuesja me inicialet B.G. ka raportuar se ish-bashkëshorti i saj, me inicialet N.L., e ka ngacmuar vazhdimisht përmes mesazheve dhe komunikimeve në rrjete sociale, duke ushtruar presion dhe dhunë psikike të vazhdueshme.

Sinjali mëson se bëhet fjalë për Nexhat Llapaj, ku pas denoncimit, i dyshuari është shoqëruar në stacion policor dhe gjatë intervistimit ka pranuar se posedon një armë zjarri.

Njësitë policore kanë realizuar kontroll në banesën e tij, ku janë gjetur dhe sekuestruar një armë automatike e tipit kallashnikov, me prejardhje kineze pa numër serik, si dhe 16 fishekë të kalibrit 7.62 mm.

Lidhur me rastin janë njoftuar hetuesi kujdestar për dhunë në familje, Njësia e Hetimeve të Kryeqytetit dhe NJHP, duke pasur parasysh se i dyshuari është punëtor i OSCE-së.

Pas konsultimit me prokurorin kujdestar, është urdhëruar që i dyshuari të lirohet në procedurë të rregullt, ndërsa arma dhe municioni të mbeten të sekuestruara si prova materiale.

Ngjarja është iniciuar si rast i veprës penale “Ngacmim”, ndërsa hetimet janë në vazhdim për të vlerësuar edhe përgjegjësinë penale lidhur me posedimin e paautorizuar të armës.

Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.

Sinjali – aty ku e vërteta flet para lajmit!

/GazetaSinjali/

The post Ekskluzive: Ky është punëtori i OSCE-së që u arrestua për ngacmim dhe dhunë psikike ndaj ish-gruas, iu gjet edhe kallashnikov me 16 fishekë appeared first on Sinjali.