Ekskluzive | Ky është i dyshuari për të shtënat në Bivolak të Vushtrrisë

Burime të besueshme nga strukturat e afërta me hetimin konfirmojnë për Gazetën Sinjali se personi që dyshohet të ketë shtënë disa herë me armë mbrëmë në fshatin Bivolak të Vushtrrisë është Faton Saraqi, 38 vjeçar.

Sipas informatave, rreth orës 22:00, Saraqi dyshohet se ka shtënë 3–4 herë me armë zjarri në drejtim të panjohur, në rrethana që po lidhen me një konflikt të mëhershëm mes palëve. Viktima A.D, 23 vjeçar, është paraqitur në Polici dhe ka deklaruar se nga frika është larguar me veturë dhe nuk e ka raportuar rastin mbrëmë.

Një dëshmitar që ndodhej në vendin e ngjarjes ka konfirmuar se Saraqi ka shtënë “për ta frikësuar” viktimën. Me autorizim të Prokurorit, Policia ka bastisur shtëpinë e të dyshuarit, ku janë gjetur dhe sekuestruar 14 fishekë të kalibrit 9mm, ndërsa i dyshuari nuk është hasur dhe është shpallur në kërkim.

Rasti është iniciuar si “Mbajtje në pronësi, kontroll ose posedim i paautorizuar i armës” dhe “Përdorim i armës apo mjetit të rrezikshëm”. Hetimet po vazhdojnë.

Sinjali – aty ku e vërteta flet para lajmit!

/GazetaSinjali/

The post Ekskluzive | Ky është i dyshuari për të shtënat në Bivolak të Vushtrrisë appeared first on Sinjali.