Ekskluzive: Ky është gjilanasi që u kap me 29 qese marihuanë gati për shitje, tentoi t’i hedhë gjatë ikjes nga policia

Sinjali pak më parë raportoi se një person është arrestuar pasditen e 25.11.2025 në Gjilan, pasi është kapur në posedim të substancave narkotike, të gatshme për shpërndarje.

Ngjarja kishte ndodhur rreth orës 17:30 në rrugën “Vjosa”, afër parkut Banja, ku njësitet e Rendit të Stacionit Policor në Gjilan në bashkëpunim me Task Forcën e Rajonit kanë ndaluar të dyshuarin, i cili kishte tentuar të ikë nga policia.

Sinjali merr vesh ekskluzivisht se bëhet fjalë për Behar Rexhepin, rreth 24-vjeçar.

Gjatë ikjes, i njëjti është përpjekur të hedhë një çantë dore, në të cilën policia ka gjetur 29 qese me substancë të dyshuar narkotike të llojit marihuanë, me peshë të përgjithshme 31.22 gram, të gatshme për shitje. Po ashtu, atij i janë konfiskuar edhe 69 euro para të gatshme, që dyshohet të jenë nga aktiviteti i paligjshëm.

Substancës së dyshuar i është bërë testi fushor, ku ka rezultuar pozitiv për narkotikë.

Në lidhje me rastin është njoftuar Prokurori i Shtetit nga Prokuroria Themelore në Gjilan, i cili ka urdhëruar inicimin e rastit për veprën penale nga neni 267 i KPRK-së – blerja, posedimi, shpërndarja dhe shitja e paautorizuar e substancave narkotike, si dhe ka sugjeruar që i dyshuari të dërgohet në mbajtje për 48 orë.

Hetimet janë në vazhdim, ndërsa autoritetet po punojnë për zbardhjen e plotë të rastit dhe verifikimin e rrjetit të mundshëm të shpërndarjes.

Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.

Sinjali – aty ku e vërteta flet para lajmit!

/GazetaSinjali/

The post Ekskluzive: Ky është gjilanasi që u kap me 29 qese marihuanë gati për shitje, tentoi t’i hedhë gjatë ikjes nga policia appeared first on Sinjali.