Ekskluzive | “10 ditë nuk më lanë ta vizitoj bashkëshorten, po fshehin diçka” – denoncimi i pazakontë në Gjakovë, nis hetimi për trajtim të pandërgjegjshëm mjekësor

Një denoncim i pazakontë është bërë dje në Gjakovë, ku bashkëshorti i një gruaje që ndërroi jetë në repartin e kujdesit intensiv ka kërkuar ndërhyrjen e Policisë, duke pretenduar se stafi mjekësor dhe familjarë të viktimës po fshihnin diçka, mëson ekskluzivisht Gazeta Sinjali.

Ngjarja ka ndodhur rreth orës 09:30, në rrugën “Dëshmorët e Lirisë”.

Sipas të dhënave që disponon Sinjali, ankuesi G.A., rreth 53-vjeçar ka raportuar se bashkëshortja e tij, Muzafere Rizvanolli, rreth 69-vjeçare, ka ndërruar jetë dhe se stafi mjekësor nuk e kishte njoftuar Policinë, siç kërkohet në rastet e vdekjeve të dyshimta.

Ai ka deklaruar se për 10 ditë me radhë nuk i është lejuar ta vizitojë bashkëshorten, ndërsa të pranishëm në dhomë, sipas tij, kanë qenë vetëm motra e të ndjerës, Sh. R. B dhe vëllai i saj, B. R. Ankuesi dyshon se stafi mjekësor ka vepruar në koordinim me ta, duke mos e lejuar të hyjë dhe duke “fshehur diçka lidhur me trajtimin”.

Lidhur me rastin është konsultuar Prokurori kujdestar, i cili ka urdhëruar iniciimin e veprës penale “Trajtimi i pandërgjegjshëm mjekësor” dhe njoftimin e Institutit të Mjekësisë Ligjore për tërheqjen e trupit të viktimës për obduksion.

Sipas burimeve të Sinjalit, rreth orës 22:30, IML ka bërë tërheqjen e trupit të pajetë për ekzaminim.

Hetimet janë duke vazhduar për të sqaruar rrethanat e vdekjes dhe përgjegjësitë e mundshme.

Sinjali – aty ku e vërteta flet para lajmit!

/GazetaSinjali/

The post Ekskluzive | “10 ditë nuk më lanë ta vizitoj bashkëshorten, po fshehin diçka” – denoncimi i pazakontë në Gjakovë, nis hetimi për trajtim të pandërgjegjshëm mjekësor appeared first on Sinjali.