Dhunë në familje në Mitrovicë: Gruaja raporton se është sulmuar nga bashkëshorti, i dyshuari ndalohet për 48 orë

Një incident i dhunës në familje është raportuar mbrëmë në Mitrovicë, ku një grua ka kërkuar ndihmën e Policisë pasi, sipas saj, është sulmuar fizikisht nga bashkëshorti, mëson ekskluzivisht Gazeta Sinjali.

Ngjarja ka ndodhur rreth orës 20:00, në rrugën “Dëshmorët e Kombit”.

Sipas të dhënave që disponon Sinjali, ankuesja ka deklaruar se bashkëshorti i saj, E. Th., rreth 40-vjeçar, ka ushtruar dhunë fizike ndaj saj dhe se problemet mes tyre kanë qenë të vazhdueshme që nga martesa. Patrulla policore ka shkuar menjëherë në vendin e ngjarjes dhe është takuar me viktimën, e cila, sipas informacioneve, ka pranuar edhe trajtim mjekësor për lëndimet e marra.

I dyshuari është arrestuar dhe shoqëruar në Stacionin Policor për procedura të mëtejshme. Lidhur me rastin është njoftuar njësia e hetimeve, e cila ka kontaktuar Prokurorin e Shtetit.

Prokurori e ka kualifikuar ngjarjen si “Lëndim i lehtë trupor” dhe ka urdhëruar që viktimës t’i lëshohet Urdhër për Mbrojtje të Përkohshme Emergjente, ndërsa ajo është sistemuar te familja e saj.

Pas intervistimit, me vendim të Prokurorit, i dyshuari është ndaluar për 48 orë, ndërsa procedurat hetimore janë duke vazhduar.

Sinjali – aty ku e vërteta flet para lajmit!

/GazetaSinjali/

The post Dhunë në familje në Mitrovicë: Gruaja raporton se është sulmuar nga bashkëshorti, i dyshuari ndalohet për 48 orë appeared first on Sinjali.