Ambasadori palestinez në Tiranë: Kosovën s’e njohëm shkaku i ambasadës në Jerusalem – por s’i dihet kurrë

Ambasadori i Palestinës në Shqipëri, Sami Mhanna, ka deklaruar se vendi i tij nuk e njeh Kosovën për shkak të hapjes së Ambasadës së Kosovës në Jerusalem.

Ai tha se megjithatë, nuk mund të dihet kurrë nëse Palestina do të ndryshojë qëndrim për këtë çështje.

“Sa i përket njohjes së Kosovës, nuk i dihet kurrë. E kam thënë shumë herë më parë në intervista, dhe shumë njerëz janë zemëruar me mua. I kam parë komentet, jam përballur me kritika. Unë kam folur nga këndvështrimi i qeverisë sime. Palestinezët në përgjithësi, edhe qeveria e Palestinës, nuk kanë asgjë kundër Kosovës dhe popullit të Kosovës”, tha Mhanna.

Ai shtoi se çështja kryesore lidhet me vendosjen e Ambasadës në Jerusalem.

“Çështja e zhvendosjes, ose më saktë themelimi i Ambasadës së Kosovës në Jerusalem. Jerusalemi është territor i pushtuar. Sipas të drejtës ndërkombëtare, konsiderohet territor i pushtuar, dhe nuk mund të hapësh ambasadë atje sepse konsiderohet shkelje e hapur e të drejtës ndërkombëtare. Këtë ia kam thënë edhe presidentit (Bajram) Begaj. Ai më pyeti pse Palestina nuk e ka njohur Kosovën. Unë i thashë, kjo është arsyeja kryesore”, deklaroi ambasadori për tch.

Mhanna tha se njeh personalisht homologun e tij kosovar në Tiranë dhe se flet normalisht me të, duke theksuar se vendi i tij nuk ka asgjë kundër popullit të Kosovës.

Ai gjithashtu sqaroi një raport që i atribuohej presidentit palestinez Mahmoud Abbas, i cili pretendonte se Palestina nuk e njeh Kosovën për shkak të Serbisë: “Kështu është thënë, por ai nuk e ka thënë atë gjë. Të gjitha ato raporte kanë qenë të gabuara. Çështja e Kosovës ka qenë e lidhur me të drejtën ndërkombëtare, kështu e di unë”, tha Mhanna.

Ambasadori theksoi se shumë njerëz e pyesin nëse hapja e Ambasadës në Jerusalem është arsye e fortë për të mos njohur Kosovën. “Por unë nuk e di çka ka ndodhur atëherë, ndoshta ka gjëra që ne nuk i dimë. Unë po e them pozicionin e vendit tim. Çështja është se Ambasada u hap në Jerusalem. Kjo ka qenë arsyeja kryesore”, shtoi ai.

I pyetur nëse ka vizituar Kosovën, Mhanna tha: “Kur më caktuan për ambasador në Shqipëri, erdha me makinë. Kalova nëpër Kosovë, nuk u ndala në Prishtinë, por është shumë e bukur. Pash male e natyrën. Absolutisht planifikoj ta vizitoj së shpejti”.

Sinjali – aty ku e vërteta flet para lajmit!

/GazetaSinjali/

The post Ambasadori palestinez në Tiranë: Kosovën s’e njohëm shkaku i ambasadës në Jerusalem – por s’i dihet kurrë appeared first on Sinjali.