Ky është personi që u kap me kallashnikov në dorë në Uglar të Gjilanit – dyshohet edhe për kanosje

Një incident i rëndë është raportuar dje pasdite në fshatin Uglar të Gjilanit, ku një qytetar ka kërkuar ndihmën e Policisë pasi është kanosur nga një person i armatosur, mëson ekskluzivisht Gazeta Sinjali.

Ngjarja ka ndodhur rreth orës 14:30, kur ankuesi I.Z. ka telefonuar Policinë duke deklaruar se ishte kërcënuar nga Sahit Hajrullahu, person i njohur për organet e rendit.

Patrulla ka reaguar menjëherë dhe në vendin e ngjarjes ka hasur të dyshuarin, i cili, sipas burimeve të Sinjalit, po mbante një kallashnikov në dorë.

Arma automatike është konfiskuar menjëherë, ndërsa i dyshuari është shoqëruar fillimisht në Stacionin Policor të Gjilanit.

Sipas informacioneve të siguruara, të gjitha veprimet janë kryer në koordinim me Prokuroren kujdestare , e cila ka lëshuar vendimin për ndalimin e të dyshuarit për 48 orë.

Me autorizim të Prokurores, hetuesit kanë realizuar edhe një bastisje në shtëpinë e të dyshuarit, ku nuk është gjetur ndonjë armë tjetër apo sende të kundërligjshme.

Rasti është iniciuar për veprat penale “Mbajtje në pronësi, kontroll ose posedim të paautorizuar të armëve” dhe “Kanosja”, dhe dosja i është dorëzuar NJHK-së për procedim të mëtutjeshëm.

Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.

Sinjali – aty ku e vërteta flet para lajmit!

/GazetaSinjali/

The post Ky është personi që u kap me kallashnikov në dorë në Uglar të Gjilanit – dyshohet edhe për kanosje appeared first on Sinjali.