Kurti shtron drekë për Ditën e Falënderimeve me ambasadën amerikane: Marrëdhëniet me SHBA-në janë ndërtuar mbi vlera të përbashkëta

Kryeministri në detyrë, Albin Kurti, ka shtuar këtë të martë një drekë për të Ngarkuarën me Punë në Ambasadën Amerikane në Kosovë, Anu Prattipati, dhe stafin e saj, me rastin e Ditës së Falënderimeve.

Sipas njoftimit nga Kryeministria, kjo drekë e përbashkët ndërmjet zyrtarëve të Qeverisë së Kosovës dhe Ambasadës së SHBA-së tashmë po organizohet për vitin e dytë, me synim që të shndërrohet në një traditë shumëvjeçare.

“Dreka përfshiu shumë nga ushqimet që tradicionalisht shërbehen gjatë një darke të Ditës së Falënderimeve. Kjo festë është kremtuar në Shtetet e Bashkuara për gati 400 vjet dhe u shpall festë vjetore kombëtare nga Presidenti Lincoln në vitin 1863. Ajo ofron një mundësi të mirë për të shprehur falënderim për marrëdhëniet që ndajmë, të cilat vazhdojnë të thellohen”, thuhet në njoftim.

Tutje theksohet se marrëdhëniet me Shtetet e Bashkuara janë ndërtuar mbi vlera të përbashkëta, mirënjohje dhe respekt të ndërsjellë.

“Këtë vit, me qëllim të forcimit të raporteve tona bilaterale, kemi marrë vendim për 0% tarifa për mallrat amerikane, kemi arritur dakordim për strehimin e përkohshëm të shtetasve të vendeve të treta dhe kemi bërë prokurime të rëndësishme në fushën e mbrojtjes”, përfundon njoftimi i Kryeministrisë për drekën e përbashkët të Kurtit me Prattipatin dhe stafin e saj.

Sinjali – aty ku e vërteta flet para lajmit!

/GazetaSinjali/

The post Kurti shtron drekë për Ditën e Falënderimeve me ambasadën amerikane: Marrëdhëniet me SHBA-në janë ndërtuar mbi vlera të përbashkëta appeared first on Sinjali.