I pakënaqur me rezultatet, Guardiola: Nuk më pëlqen të pësojmë gjashtë gola në dy ndeshje

Pep Guardiola, trajneri i Manchester City-t, ka pranuar se skuadra e tij duhet të përmirësohet në fazën defensive, duke theksuar se problemet e shfaqura në dy ndeshjet e fundit nuk mund të injorohen. City do të presë Sunderland-in këtë të shtunë në raundin e 15-të të Premier League, para udhëtimit të rëndësishëm në Madrid për përballjen me Realin në Ligën e Kampionëve.

Edhe pse kampionët në fuqi kanë fituar dy ndeshjet e fundit ndaj Leeds-it dhe Fulham-it, ata kanë pësuar gjithsej gjashtë gola – dy në fitoren 3-2 kundër Leeds-it dhe katër në triumfin 5-4 ndaj Fulham-it.

Në konferencën për shtyp, Guardiola shprehu shqetësimin për këto dobësi të mbrojtjes.

“Ne duhet të përmirësohemi, me siguri. Nuk më pëlqen të pësoj gjashtë gola në dy ndeshje. Do të flasim për këtë sot, ndoshta edhe nesër në mëngjes. Duhet të punojmë për atë që mund të bëjmë më mirë dhe të jemi më të fortë. E kam parë përsëritjen dhe e di çfarë duhet të bëjmë,” deklaroi trajneri spanjoll.

Guardiola theksoi se ndeshja me Fulham-in tashmë ka mbetur pas, por mësimet duhet të nxirren:

“Sigurisht, jam i shqetësuar për disa gjëra dhe duhet të mësojmë pse po pësojmë gola. Vlerësoj shumë Marcon Silvën dhe e di që të shënosh pesë gola atje nuk është e lehtë. Humbja e këtij momenti është pjesë e procesit dhe duhet ta pranojmë.”

Manchester City do të kërkojë të shfrytëzojë duelin e së shtunës kundër Sunderland-it për të rritur presionin ndaj Arsenalit, që këtë javë viziton Aston Villën në një transfertë të vështirë. Aktualisht, City renditet pesë pikë larg kryesuesve. Pas sfidës së Premier League, skuadra e Guardiolës do të niset drejt Madridit për supersfidën e Ligës së Kampionëve ndaj Realit.

Sinjali – aty ku e vërteta flet para lajmit!

/GazetaSinjali/

The post I pakënaqur me rezultatet, Guardiola: Nuk më pëlqen të pësojmë gjashtë gola në dy ndeshje appeared first on Sinjali.