Ekskluzive | Tentim-vrasje e rëndë në Fushë Kosovë: Viktima dyshohet se u godit me thikë nga i fejuari, ngjarja u kamuflua si prerje me gotë

Një incident i rëndë ka ndodhur dje në mëngjes në Fushë Kosovë, ku një vajzë ka përfunduar në QKUK si pasojë e një plage të thellë të shkaktuar me mjet të mprehtë, mëson ekskluzivisht Sinjali.

Sipas burimeve të besueshme nga strukturat e afërta me hetimin, rasti po trajtohet si “Vrasje e rëndë në tentativë”, ndërsa i dyshuari, i fejuari i saj, E.G. 29 vjeçar, është arrestuar.

Ngjarja ka ndodhur rreth orës 07:45, kur është kërkuar urgjentisht një ambulancë në rrugën Enver Maloku në Fushë Kosovë. Njësitë policore, së bashku me ekipin mjekësor, kanë hyrë në banesën ku është gjetur viktima D.T, 23 vjeçare, me plagë të rëndë. Fillimisht, të dy – viktima dhe i dyshuari – kanë pretenduar se lëndimi kishte ndodhur aksidentalisht nga një gotë e thyer.

Viktima është dërguar fillimisht në QKMF dhe më pas në QKUK për trajtim të specializuar.

Rreth orës 11:55, nga QKUK është njoftuar Policia se plagët nuk përputheshin me prerje nga gota, por me goditje nga mjet i mprehtë, duke kërkuar ndërhyrje të menjëhershme kirurgjikale. Kjo ka ngritur dyshime të forta për rrethanat reale të ngjarjes.

Me autorizim të Prokurorisë së Krimeve të Rënda, hetuesit dhe njësia e forenzikës kanë dalë në vendin e ngjarjes, ku gjatë ekzaminimit është gjetur dhe sekuestruar një thikë, e cila dyshohet se është përdorur në plagosjen e viktimës.

Gjatë procedurave, i dyshuari ka ndryshuar deklarimin, duke thënë verbalisht se “viktima e ka lënduar veten me thikë”, por se nuk e kishte raportuar “që të mos e merrte vesh familja e saj”.

Prokurorja e Krimeve të Rënda ka udhëzuar ekzaminimin e vendit të ngjarjes, sekuestrimin e provave, si dhe përfshirjen e Hetimeve Rajonale në ndërmarrjen e të gjitha veprimeve të nevojshme për zbardhjen e rastit.

Rasti është iniciuar si “Vrasje e rëndë në tentativë” me udhëzim të Prokurores, ndërsa hetimet po vazhdojnë.

Sinjali – aty ku e vërteta flet para lajmit!

/GazetaSinjali/

The post Ekskluzive | Tentim-vrasje e rëndë në Fushë Kosovë: Viktima dyshohet se u godit me thikë nga i fejuari, ngjarja u kamuflua si prerje me gotë appeared first on Sinjali.