Dueli me Sllovakinë në garën për kualifikim në Botërorë, Calzona: Kosova kundërshtare e fortë

Kohët e fundit, shorti i kualifikimeve për Botërorin 2026 vendosi Kombëtaren e Kosovës përballë një kundërshtari të veçantë – Sllovakisë, një shtet që ende nuk e njeh pavarësinë e Kosovës. Ky është një moment historik për Dardanët, pasi për herë të parë ata do të ndeshen me Sllovakinë në një ndeshje zyrtare të FIFA-s, ndërkohë që për Kosovën është hera e parë që arrin në fazën e play-off-it të eliminatoreve për një Botëror.

Trajneri i Kombëtares sllovake, Francesco Calzona, e vlerësoi rritjen e ekipit të Kosovës, duke theksuar arritjet e tyre të jashtëzakonshme gjatë fazës së grupeve. Ai e përmendi si shembuj fitoret ndaj Suedisë dhe Sllovenisë, duke theksuar se Kosova është një skuadër që po bëhet gjithnjë e më e fortë.

“Kosova është një ekip që po rritet për sa i përket performancës së futbollit. Kanë gjetur rrugën dhe po e ndjekin, dhe tani janë duke i korrur frutet e para. Në kualifikimet për Botëror, ata kanë mposhtur Suedinë dhe Slloveninë, kanë barazuar në shtëpi ndaj Zvicrës. Ne duhet ta shfrytëzojmë përparësinë e terrenit vendas, edhe pse Kosova mbetet një kundërshtar i pakëndshëm dhe i fortë, madje edhe kur luan si mysafire,” tha Calzona.

Në të njëjtën kohë, asistenti i trajnerit të ekipit sllovak, Simone Bonomi, theksoi se Kosova është pa dyshim një kundërshtar i vështirë. Ai e vlerësoi ekipin e Kosovës për fitoret e mëdha që ka arritur në kualifikimet e Botërorit, duke përmendur veçanërisht fitoren ndaj Suedisë dhe Sllovenisë, ekipe që, sipas tij, Sllovakia i njeh mirë.

“Kosova është pa dyshim një kundërshtar i vështirë. Në kualifikime e ka mposhtur dy herë Suedinë dhe ka fituar edhe ndaj Sllovenisë, pra ekipe që edhe ne i njohim mirë. Ka lojtarë shumë të mirë si Rrahmani, Muriqi, Vojvoda dhe të tjerë. Për herë të parë është kaq afër kualifikimit në Botëror, gjë që pa dyshim do t’u japë lojtarëve të tyre entuziazëm të madh. Fakti që luajmë në shtëpi mund të jetë një avantazh i yni, dhe njësoj e shoh edhe në rast të një finaleje të mundshme të Play-Off-it,” deklaroi Bonomi.

Ndërkohë, sulmuesi i Kombëtares sllovake, Ivan Schranz, shprehu se ai ende nuk e njeh mirë Kombëtaren e Kosovës, por shpreson ta studiojë ekipin deri në muajin mars, kur do të zhvillohet ndeshja vendimtare.

Sinjali – aty ku e vërteta flet para lajmit!

/GazetaSinjali/

The post Dueli me Sllovakinë në garën për kualifikim në Botërorë, Calzona: Kosova kundërshtare e fortë appeared first on Sinjali.