Ceremonia e betimit në Odën e Avokatëve, Berisha me mesazh për juristët e rinj

Oda e Avokatëve të Kosovës ka mbajtur ceremoninë e Betimit Solemn për 32 avokatë dhe 37 praktikantë.

Kryetari i Odës, avokati Besnik Berisha, u kërkoi juristëve të rinj ta mbrojnë me dinjitet profesionin e tyre duke theksuar se ata do të duhet të qëndrojnë të fortë përballë sfidave profesionale.

“Sot, ju merrni një përgjegjësi të madhe, sepse fjala juaj do të prek jetët e njerëzve. Ata që veshin petkun e avokatit duhet ta mbrojnë atë, sepse bëhen pjesë e një familjeje prej mbi 1500 anëtarësh”, tha Berisha.

Ai theksoi se avokatët e rinj duhet të angazhohen aktivisht në mbrojtjen e të drejtave të njeriut dhe funksioneve demokratike të shtetit. Sipas tij, Oda e Avokatëve do të mbetet mbështetje e pandashme për ta.

“Petkun e avokatit mos e lejoni të nëpërkëmbet. Misioni ynë është të drejtat themelore të njeriut, që janë themeli i demokracisë”, shtoi ai.

Berisha paralajmëroi se juristët e rinj do të përballen me sfida të mëdha, dhe iu kërkoi që të jenë të pathyeshëm dhe të mos heshtin kur vjen puna për mbrojtjen e drejtësisë.

Pas fjalimit të Berishës u zhvillua ceremonia e betimit.

Sinjali – aty ku e vërteta flet para lajmit!

/GazetaSinjali/

The post Ceremonia e betimit në Odën e Avokatëve, Berisha me mesazh për juristët e rinj appeared first on Sinjali.