Serwer: Presioni ndërkombëtar ndaj Serbisë është i domosdoshëm, por i vështirë për t’u realizuar

Profesori amerikan Daniel Serwer ka shprehur dëshirën që komuniteti ndërkombëtar të ushtrojë më shumë presion ndaj Serbisë, me qëllim që ajo të ndalë shfrytëzimin e situatës në veri të Kosovës për interesa të dëmshme.

Megjithatë, Serwer paralajmëron se një presion i tillë ka shumë pak gjasa të sjellë ndryshime të mëdha.

Ai vlerëson se presidenti serb Aleksandar Vuçiq ka zgjedhur të mos jetë udhëheqësi që do të normalizojë marrëdhëniet me Kosovën e pavarur dhe, akoma më pak, që të njohë sovranitetin dhe integritetin territorial të saj. “Për këtë do të nevojitet një president tjetër në Beograd”, ka deklaruar Serwer për Kallxo.

Duke folur për situatën brenda Kosovës, profesori amerikan thekson se Bashkimi Evropian duhet të intensifikojë presionin që vendi të përqendrohet në integrimin e komunitetit serb dhe në trajtimin e tyre në mënyrë të barabartë. “Nuk njoh shumë kosovarë shqiptarë që nuk e kuptojnë sa e rëndësishme është kjo, por ta zbatosh në praktikë është shumë më e vështirë se sa ta thuash”, ka shtuar ai.

Sa i përket ndryshimeve gjeopolitike globale, Serwer shprehet se Kosova dhe Serbia ndodhen aktualisht shumë poshtë në listën e prioriteteve të SHBA-së dhe Bashkimit Evropian. “Nëse do të arrihet ndonjë përparim, do të duhen njerëz në Beograd dhe në Prishtinë që e dëshirojnë atë”, ka theksuar profesori.

Sinjali – aty ku e vërteta flet para lajmit!

/GazetaSinjali/

The post Serwer: Presioni ndërkombëtar ndaj Serbisë është i domosdoshëm, por i vështirë për t’u realizuar appeared first on Sinjali.