EKSKLUZIVE | Ky është i dyshuari që sulmoi ish-të dashurën në vetëshërbimin “Belegu” në Pejë – ndalohet 48 orë

Një incident shqetësues ka ndodhur më 23.11.2025 rreth orës 08:30 në rrugën “Bekim Berisha – Abeja” në Pejë, ku një e re është sulmuar fizikisht në ambientin e punës nga ish-partneri i saj, në kuadër të një rasti që po trajtohet si dhunë në familje.

Viktima A.B. ka deklaruar se kishte qenë në lidhje dashurie me të dyshuarin për rreth tri vite, por marrëdhënia ishte ndërprerë para një viti e gjysmë.

Gazeta Sinjali merr vesh se i dyshuari është Valmir Berisha.

Sot, i dyshuari dyshohet se ka shkuar në vendin e saj të punës, në vetëshërbimin “Belegu”, ku fillimisht i ka kërkuar të largohej me të. Pas refuzimit, ai ka tentuar ta tërheqë fizikisht për krahu dhe më pas e ka goditur me grusht në anën e djathtë të fytyrës, duke i shkaktuar lëndime të lehta trupore.

E dëmtuara është dërguar për trajtim mjekësor në Emergjencën e Spitalit të Përgjithshëm në Pejë, ku është konstatuar se kishte lëndime në pjesën e djathtë të fytyrës. Pas trajtimit, ajo është intervistuar nga policia.

Policia ka lokalizuar dhe arrestuar të dyshuarin në fshatin Llozhan, në shtëpinë e tij. Gjatë testimit me alkool, është konstatuar se ai kishte 0.90 promil alkool në gjak, nivel mbi të lejuarën.

Prokurori i Shtetit është njoftuar me detajet e rastit dhe ka urdhëruar inicimin e procedurës hetimore për veprën penale “Lëndim i lehtë trupor”, ndërsa ndaj të dyshuarit është caktuar masa e ndalimit për 48 orë.

Rasti mbetet nën hetime të mëtejme nga organet kompetente.

Sinjali – aty ku e vërteta flet para lajmit!

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.

/GazetaSinjali/

The post EKSKLUZIVE | Ky është i dyshuari që sulmoi ish-të dashurën në vetëshërbimin “Belegu” në Pejë – ndalohet 48 orë appeared first on Sinjali.