43-vjeçari kosovar bie në prangat e policisë në Shqipëri, u kap me 23 kg kanabis drejt Kosovës

Policia e Tiranës ka finalizuar operacionin e koduar “Transporter”, i zhvilluar nga Komisariati i Policisë Krujë në bashkëpunim me Seksionin për Hetimin e Narkotikëve të DVP Tiranë, me qëllim goditjen e veprimtarive kriminale në fushën e narkotikëve. Operacioni u realizua pas informacioneve të siguruara në rrugë operative.

Si rezultat i këtij operacioni, u arrestua shtetasi kosovar L. Ç., 43 vjeç, banues në Kosovë, i cili u kap duke transportuar me automjet sasinë prej 23 kilogramë e 65 gramësh lëndë të dyshuar narkotike Cannabis Sativa, që dyshohet se do të trafikohej drejt Kosovës.

Ndërhyrja e Policisë u bë në vendin e quajtur “Ura e Stafukës”, në fshatin Larushk, ku u ndalua automjeti tip “Skoda” që drejtohej nga 43-vjeçari. Gjatë kontrollit të mjetit u gjetën disa pako me lëndën narkotike, të cilat bashkë me automjetin u sekuestruan në cilësinë e provës materiale.

Policia po vijon hetimet për të dokumentuar plotësisht veprimtarinë dhe për të identifikuar persona të tjerë që mund të jenë të përfshirë në këtë rrjet trafiku.

Materialet procedurale i janë referuar Prokurorisë për veprime të mëtejshme.

Sinjali – aty ku e vërteta flet para lajmit!

/GazetaSinjali/

The post 43-vjeçari kosovar bie në prangat e policisë në Shqipëri, u kap me 23 kg kanabis drejt Kosovës appeared first on Sinjali.